د افغانستان د هستوي انرژۍ ادارې معلوماتي مرکزي سیستم پرانیستل شو
د افغانستان د هستوۍ انرژۍ اداري معلوماتي مرکزي سیستم، چې د مخابراتي خدمتونو د تنظیم ادارې (ATRA) په مالي او تخنیکي همکارۍ جوړ شوی ګټې اخستنې ته وسپارل شو.
د هستوي انرژۍ اداري معلوماتي مرکزي سیستم ددي اداري د اړیکو پیاوړي کولو او د سافت ویر او هاډ ویر په برخه کې د لا ښه توب په موخه، د هستوي انرژۍ اداري د عمومي رئیس ډاکټر طاهر شاران او د اترا اداري سرپرست او تخنیکي معاون ښاغلی عمر منصور انصاري له خوا د ځانګړو مراسمو په ترڅ کې پرانستل شوه.
په دي پرانستغونډه کې د هستوي انرژۍ اداري عمومي رئیس ښاغلي ډاکټر طاهر شاران ددي اداري د معلوماتي مرکزي سیستم جوړول د اترا اداري د مالي او تخنیکي مرستو څخه د مننې تر څنګ زیاته کړه چې د اترا اداري له رامنځ ته کیدولو تر ډي دمه ټول فعالیتونه یې د ستاینې وړ دي. د هیواد پراختیاېي سکتورونه په تیرو ۱۹ کلونو کې، په خاصه توګه د مخابراتو سکتور یو له کامیابه سکتورونو څخه ګنل کیږي چې د مخابراتي فعالیتونو د نظارت او کنټرول په برخه کې یې ډیر جدي اقدامات کړي، او په خاصه توګه د خصوصي شرکتونو د سالم رقابت له پاره یې زمینه برابره کړي ده. ښاغلي شاران زیاته کړه اړینه ده د هیواد ټول سکټورونه د مخابراتي سکتور له تجربو څخه په خپلو سکتورونو کې ګټه پورته کړي، تر څو وکړای شو د سالمو رقابتونو په رامنځ ته کولو سره هیوادوالو ته ښه خدمات وړاندي کړو.
ډاکټر شاران زیاته کړه دا سیستم د بریښنايې حکومت داري په برخه کې او د دي سیستم په کارولو سره، همدارنګه د څیړنو په برخه د هستوي ټکنالوژۍ څخه کار اخستل، د ورځنیو چارو تنظیم، لکه په سازمان کې دننه د خاصو برنامو کارول او شریکول، د لوړو مشخصاتو په درلودلو سره د سافټویر او هارډویر منابعو شریکول، د ادارې کارونو په رامنځ ته کولو ګټور رول درلودلای شي او کولای شو مونږ د هیواد د پرمختګ په برخه کې لا ښه سهم ولرو او کار وکړو.
ښاغلي شاران په ورځنې ژوند کې د ټکنالوژۍ کارول یو له حیاتي مسایلو څخه وبلل او زیاته یې کړه چې د هیوادونو اوسنی پرمختګ او هوساینه د علمي څیړنو او کشفیاتو، په خاصه توګه له ټکنالوژۍ څخه ګټه اخستنه او دا ټول د علم محصول دي. ښاغلي شاران په خپلو خبرو کې وویل د ټکنالوژۍ په برخه کې پانګونه د هیوادونو تر منځ اړیکې لا جدي او پیاوړي کړي دي. هر څومره چې هیوادونه د ټکنالوژۍ په برخه کې پرمختګ کوي په هماغه اندازه یې دوامداره پرمختګ زیاتیږي او په دي برخه کې پانګونه د هیواد د ملي عوایدو د ډیریدو سبب کیږي. او همدارنګه په افغانستان کې د ټکنالوژۍ په برخه کې پانګونه اړینه او یو له مهمو ضرورتونو څخه وبلل ډاکټر طاهر شاران وویل دا موضوعات باید د هیواد د سیاست په بیلا بیلو برخو کې ورته پام وشي، لکه د اترا او هستوي انرژۍ اداره چې په یاده برخه کې فعالیتونه کوي.
ښاغلي شاران همدارنګه د خپلو خبرو په ترڅ کې زیاته کړه د نړیوال اټومي اژانس د مطالعاتو په اساس هستوي ټکنالوژۍ د هیوادونو دوامداره پرمختګ کې ۷۵ سلنه ونډه لري او د افغانستان هستوي انرژۍ اداره هڅه کوي تر څو په دي برخه کې د نورو ادارو په مرسته د ظرفیتونو او متخصصي بشري قوي په ډیرولو سره مهم او اساسي رول ولوبوي، او د هستوي ټکنالوژۍ په کارولو سره په خاصه توګه د طبابت، کرنې، صنعت، د بریښنا تولید او د ځمکي لاندي اوبو مدیریت څخه ښه ګټه پورته کړو.
ښاغلی طاهر شاران وویل هستوي ټکنالوژۍ د طبابت په برخه کې د سرطانې ناروغیو د تشخیص او درملنې په برخه کې مهم رول لري. په داسي حال کې چې په هیواد کې تر دي دمه د سرطان ناروغۍ هیڅ کوم تشخیصیه مرکز شتون نه لري. د هستوي انرژۍ اداره اماده ده چې د عامي روغتیا او ټول هغه وزارتونه چې په دي برخه کې همکار دي د افغانستان د هستوي طب د سکتور په جوړولو کې د ظرفیت جوړونې او تخصصي لارښودنو په برخه کې همکاري وکړي.
د پروګرام په ترڅ کې د اترا اداري سرپرست او تخنیکي معاون عمر منصور انصاري خبري وکړي او زیاته یې کړه، چې هیواد په بیلا بیلو برخو کې د ټکنالوژۍ کارونې ته اړتیا لري او ټکنالوژیکي او انټرنیټي خدمتونه د هري اداري له لومړیتوبونو څخه دي.
ښاغلي انصاري وویل اترا اداره تر دې دمه د مخابراتو د پراختیایي صندوق له بودجې څخه ۲۲ دولتي اداري ته د معلوماتي ټیکنالوژۍ په برخه کې په تجهیزاتو سمبال کړي او هغوۍ ته یې د معلوماتي ټیکنالوژۍ توکي لکه لابراتوارونه، کمپیوټر، سرور روم او ډیټا سنټرونه چمتو کړي دي. هغه ټینګار وکړ چې په راتلونکي کې به د هستوي انرژۍ ادارې اهمیت ته په کتلو سره به اترا اداره د یادې ادارې د پیاوړتیا لپاره خپلو تخنیکو مرستو او همکاریو ته دوام ورکړي.
دا غونډه د هستوي انرژۍ اداري لخوا اترا اداري ته د مننې په موخه چې د هستوي انرژۍ اداري د معلوماتي مرکزي سیستم په جوړولو کې مرسته کړي وه د مننلیک او ستاینلیک په ورکولو سره پای ته ورسیده.
