د جنوب زون - کندهار هستوی انرژۍ آمریت لپاره نوي امر په کار پیل وکړ
د پنجشنبې په ورځ د کندهار ولایت په مقام کې اوونیزه ادارې غونډه ترسره شوه. په یاده غونډه کې د کندهار والي ښاغلي روح الله خانزاده د کندهار ولایت مقام مرستیال فیصل شیرزی د ولایتي شورا مرستیال حاجي عبدالقیوم تر څنګ د یاد ولایت ریئسانو، امرینو او ادارې مسؤلینو ګډون درلود.
د کندهار والي ښاغلي روح الله خانزاده لخوا د جنوب غرب زون لپاره د هستوی انرژۍ ادارې نوی امر عیسی محمد احساس چې د ازادي سیالۍ له لارې یاد بست ته بریالی شوی وه ګډونوالو ته ور وپیژندل شو. ښاغلي روح الله خانزاده د مبارکۍ تر څنګ په چارو کې د لا بریا هیله وښوده. او د هر ډول مرستې ژمنه یې وکړه او له حکومت او هستوي انرژۍ ادارې له مرکزي دفتر څخه یې غوښتنه وکړه چې په یاده برخه کې لا ډیره همکارۍ ترسره کړي.
د غونډې په پای کې د هستوي انرژۍ امر ښاغلي عیسی محمد احساس ګډونوالو ته د هستوي انرژۍ ادارې په فعالیتونو، موخو او ارزښتونه په مفصل ډول معلومات وړاندي کړل او د ولایت له مقام څخه یې د همکارۍ غوښتنه وکړه.
