په ننګرهار ولایت کې د عامي روغتیا ریاست کارکونکو، ډاکټرانو او ټکنیشن کارانو ته روزنیز ورکشاپ تر سره شو
د ختيځ زون هستوي انرژۍ امريت د ۱۳۹۹/۰۹/۱۱ د ننګرهار ولايت مقام په تالار کې د ايونايزونکو وړانګو د فعاليتونو لکه اکسري، سي ټي سکن او مموګرافي ته د جواز ورکوني او له مضره وړانګو د ځان ساتني په موخه ورکشاپ وړاندي کړ. په یاد ورکشاپ کې د ننګرهار مرستيال والي پوهندوي ببرک مياخيل، د ننګرهار ولايت د روغتیا رئيس نصير احمد درانې په ګډون ګڼ شمير ډاکترانو، ټکنیشن کارانو برخه اخستې وه .
د پروګرام په پيل کې اسدالله زاهد د ختیځ زون هستوي انرژۍ امر د افغانستان د هستوي انرژۍ لنډ تاريخي بهير، په اوسني وخت کې د هستوي انرژۍ په کارونه او اهميت خبري وکړي او همداراز له ټکنیشن کارانو څخه غوښتنه وکړه تر څو د فعاليت جوازونه تر لاسه کړي.
یاد ورکشاپ کې له وړانګو څخه د ځان ساتنې امر ښاغلي ابوبکر ستوري له مضره وړانګو څخه د ځان ساتنې اصولو په اړه معلومات وړاندي کړل.
د پروګرام په پای کې د ننګرهار ولايت په استاذولۍ پوهندوي ببرک مياخيل ورته سیمینارونه اړین وبلل او هستوي انرژۍ یې د هيواد او ملت د پرمختګ او بقا لپاره ښه وسيله ياده کړه .
